Mustafa uron PD-në për 26 vjetorin, përmend Berishën e Rugovën

12 Dhjetor 2016 - 20:36      

Kryeministri i Kosovës, Isa Mustafa, ka uruar Partinë Demokratike të Shqipërisë për 26 vjetorin e themelimit.

“26 vjet më parë, më 11 Dhjetor 1990, studentët, qytetarët dhe elita intelektuale e Shqipërisë themeluan Partinë Demokratike të Shqipërisë. PD-ja kanalizoi vullnetin dhe vizionin e popullit të Shqipërisë për rrëzimin e diktaturës dhe nisjen e rrugëtimit transformues në shoqëri të hapur, pluraliste, me ekonomi të lirë të tregut dhe në përputhje me të gjitha vlerat europerëndimore”, ka shkruar Mustafa në Facebook.

Mustafa, ka thënë se bashkë me LDK-në e prirë nga Presidenti Rugova, dhe disa parti tjera simotra në rajon, PD-ja me liderin e saj, Sali Berisha, u shndërrua në motor transformues të Shqipërisë duke qenë bartëse e projektit evropianizues dhe euroatlantik.

“Partia Demokratike sot jep kontribut të çmuar në jetën demokratike dhe rrugën e Shqipërisë drejt progresit të gjithanshëm. Urime kryetarit Lulzim Basha dhe të gjithë zyrtarëve e anëtarëve të PD-së. Gëzuar!”, ka shkruar Mustafa.

© KOHA. Të gjitha të drejtat janë të rezervuara.