Qytetarët thonë se korrupsionin s’mund ta luftojnë të korruptuarit [video]

12 Dhjetor 2016 - 19:29      

Kosova vazhdon të vuajë nga korrupsioni, i cili në masë të madhe është i shprehur në prokurimin publik, ku milionat ndahen për shërbime të mëdha.

Por, qytetarëve zakonisht u qanë zemra për shpenzimet që zyrtarët i bëjnë për llogaritë e tyre, si udhëtimet e shumta jashtë vendit, drekat e darkat, telefonat dhe karburanti, raporton KTV.

Janë gjithsej 35 institucione që merren me luftimin e korrupsionit, por të anketuarit e KTV-së thonë se nuk u besojnë fare, pasi korrupsioni nuk mund të luftohet nga të korruptuarit.

Kanë humbur shpresën dhe nuk e marrin mundin as ta raportojnë këtë dukuri.

Mungesën e besimit të qytetarëve në Organizatat Joqeveritare e arsyetojnë me mostransparencën e zyrtarëve institucionalë për të deklaruar për çdo shpenzim, pasi fundja udhëtimet e tyre, por edhe të gjitha përfitimet, iu mundësohen nga paraja publike e popullit.

Sipas tyre, korrupsioni nuk është më perceptim, sepse për të dinë gjithë.

Afrim Atashi, drejtor i departamentit për parandalimin e korrupsionit, thotë se nuk mund të japë statistika, por qytetarët mund ta raportojnë korrupsionin në numrin e telefonit të menaxhuar nga Agjencia Kundër Korrupsionit.

Por, në numrin e telefonit të vënë në dispozicion të qytetarëve, sot gjatë tërë ditës nuk është lajmëruar askush.

Qytetarët thonë se korrupsionin s’mund ta... by kohanet

© KOHA. Të gjitha të drejtat janë të rezervuara.