Ish-punëtorët e KEDS-it protestojnë për respektim të vendimit të Inspektoratit [video]

12 Dhjetor 2016 - 19:21      

Punëtorët e larguar nga KEDS-i, të cilët kanë marrë vendimet e Inspektoratit të Punës për t’u kthyer në vendet e tyre të punës, kanë protestuar para distriktit të kësaj ndërmarrjeje në Mitrovicë, duke kërkuar kthimin në vendin e punës.

Kanë kërkuar sërish ndihmën e qeverisë që t’ua bëjë të mundur kthimin në punë, pasi varen nga këto paga, raporton KTV.

Në mbështetje të punëtorëve janë edhe drejtues të Federatës së Sindikatave të Pavarura ElektroKosova nga Prishtina.

Ata kanë dhënë edhe një varg propozimesh për KEDS-in vetëm që t’u bëhet i mundur kthimi në punë punëtorëve të larguar.

Punëtorët janë të vendosur që t’i shterin të gjitha mundësitë për ta vënë drejtësinë në vend, pavarësisht se mundësitë ekonomike dhe mosha po u paraqesin vështirësi.

Ata janë përkrahur edhe nga kolegët që aktualisht janë në marrëdhënie pune.

Sindikata e punëtorëve është duke i shqyrtuar mundësitë që të mbajë protesta më të mëdha dhe greva.

Nga ana tjetër, zyrtarë të KEDS-it kanë thënë se kjo kompani është e sigurt se ka vepruar në përputhje të plotë me ligjet dhe procedurat në këtë rast.

Kohavisioni merr vesh se kjo kompani është ankuar në gjykata rreth vendimeve të nxjerra nga Inspektorati i Punës, por zyrtarë të KEDS-it nuk kanë dhënë detaje për këtë veprim.

Ish-punëtorët e KEDS-it protestojnë për... by kohanet

© KOHA. Të gjitha të drejtat janë të rezervuara.