Pozitë e opozitë bashkohen në kundërshtimin me deklarata për murin në Mitrovicë [video]

12 Dhjetor 2016 - 19:03      

Si rrallëherë pozita e opozita janë bërë bashkë për të kërkuar përgjegjësi nga krerët shtetërorë për murin mbi urën e lumit Ibër.

Në Komisionin Parlamentar për Punë të Jashtme, ku e vetmja pikë e rendit të ditës ishte diskutimi për situatën aktuale në Mitrovicë, u kërkua nga Qeveria e Kosovës transparencë dhe llogaridhënie për projektin e rivitalizimit të urës së Ibrit në Mitrovicë, raporton KTV.

Të shqetësuar, anëtarët e Komisionit u dakorduan se duhet të thirret një seancë e jashtëzakonshme për këtë çështje.

Elmi Reçica i PDK-së tha se mungesën e projektit e kishte vërejtur më 2 dhjetor, kur ishte për vizitë bashkë me Komisionin në vendin e punimeve, por që nuk kishte menduar se do të kishte të tilla telashe.

Opozita e quan të vonuar takimin, ndërsa gjithsesi duan seancë të jashtëzakonshme.

Ndryshe, Aleanca për Ardhmërinë e Kosovës të premten e shkuar ka proceduar në Kuvend kërkesën për interpelancë të kryeministrit për këtë çështje.

Në rezolutën e AAK-së kërkohet edhe shkarkimi i menjëhershëm i ministres për Dialog, Edita Tahiri, si dhe ndërprerja e bisedimeve me Serbinë, derisa shteti serb ta njohë pavarësinë e Kosovës.

Pozitë e opozitë bashkohen në kundërshtimin me... by kohanet

© KOHA. Të gjitha të drejtat janë të rezervuara.