“Serbia ka njoftuar BE–në për suspendim të drejtësisë paralele në Kosovë”

10 Dhjetor 2016 - 22:04      

“Edhe Beogradi e edhe Prishtina kanë ndërmarrë hapa përfundimtarë për zbatimin e plotë të Marrëveshjes për Jurisprudencë", ka kumtuar Bashkimi Europian i cili i ka lavdëruar dy palët për këtë “arritje të rëndësishme”, transmeton Koha.net.

Në kumtesën e zëdhënëses së Komisionit Europian Maja Kocijançiç, theksohet se në “përputhje me vendimet e 30 nëntorit, Beogradi dhe Prishtina kanë ndërmarrë hapat përfundimtarë për zbatimin e plotë të Marrëveshjes për Jurisprudencë” dhe se “Serbia, më 9 dhjetor ka dërguar njoftimin për suspendimin e shërbimit të gjykatësve, prokurorëve dhe të personelit administrativ duke filluar që nga 10 janari i vitit 2017 gjë që kontribuon në integrimin e tyre në jurisprudencën kosovare”.

“Emërimi i gjykatësve, prokurorëve dhe personelit administrativ më 10 janar mundëson avancimin dhe dërgimin në vend të drejtësisë në gjithë Kosovën”, përfundon kumtesa.

Prishtina dhe Beogradi, me ndërmjetësim të BE-së, më 30 nëntor në Bruksel kanë arritur marrëveshjen për zbatimin e Marrëveshjes për Jurisprudencë të arritur më 9 shkurt 2015. 

© KOHA