“29 autoritete lokale të Kosovës ende nën sistemin e Serbisë”

10 Dhjetor 2016 - 21:22      

Në Kosovë janë 29 autoritete lokale që punon me dhe nën sistemin e Serbisë, transmeton Koha.net.

Kryetari i Këshillit për Kosovën në Kuvendin e Serbisë Milovan Drecun ka deklaruar se fillimi i punës së gjykatësve dhe prokurorëve në sistemin e drejtësisë së Kosovës nuk do të thotë se institucionet e Serbisë po shuhen në Kosovë dhe ka shtuar se të gjitha, 29 autoritetet lokale nga Kosova, do të vazhdojnë së ekzistuari dhe së punuar në sistemin e Serbisë.

“Shteti po tregon se nuk po shuhen institucionet që janë në sistemin serb”, ka thënë Drecun për rts.

Ai ka thënë se miliona euro janë paraparë për vitin e ardhshëm për investime në Kosovë nga Serbia.

Drecun ka shtuar se sivjet janë dyfishuar mjetet investuese të Serbisë në Kosovë dhe se do të ndërtohen tri shkolla e pesë qendra të mëdha shëndetësore të Serbisë që funksionojnë dhe vazhdojnë të funksionojnë në sistemin e Serbisë.

“Shteti po tregon se dëshiron të jetë i pranishëm dhe se nuk do të dëbohet nga ato hapësira”, ka thënë Drecun duke ka shtuar se Qeveria e Serbisë po investon në kthimin dhe në qëndrimin e serbëve në Kosovë.

Ai ka theksuar se Serbia do të insistojë në formimin e Asociacionit të Komunave serbe dhe se ajo bashkësi do të financohet nga Serbia.

I pyetur nëse Kosova do ta kundërshtojë financimin e AKS-së nga Serbia, Drecun ka thënë se ky është kusht për mbijetesën e serbëve dhe se shqiptarët e kundërshtojnë këtë pasi e duan Kosovën etnikisht të pastër. 

© KOHA