AAK: Për të drejtat e njeriut nuk mjaftojnë fushatat e tryezat, duhet zbatim i ligjeve

10 Dhjetor 2016 - 13:15      

Aleanca për Ardhmërinë e Kosovës ka thënë se 10 dhjetori përkujton ditën e vitit 1948 kur Asambleja e Përgjithshme e Kombeve të Bashkuara miratoi Deklaratën Universale për të Drejtat e Njeriut.

Ndërsa shënimi i kësaj dite formalisht e ka pikënisjen më 1950, kur me nismën e Asamblesë nëpërmjet Rezolutës 423 (V), kjo datë u caktua si Ditë Ndërkombëtare e të Drejtave të Njeriut.

“Në Kosove ligji për barazi, ligji kundër diskriminimit si dhe ligji për avokatin e popullit janë aprovuar mirëpo nuk po gjejnë zbatim sikur edhe shumë ligje tjera. Prandaj si AAK disa herë e edhe në këtë ditë shprehim qëndrimin tonë se tryezat me tema për të drejtën e njeriut, fushatat vetëdijesuese të shoqërisë civile e edhe të institucioneve janë të nevojshme por me shumë se kaq sot nevojiten ligje të implementueshme me auditime të shpeshta dhe raportime të zbatueshmërisë me fakte”, thuhet në reagimin e AAK-se.

Kushtetuta e Kosovës jo vetëm që pasqyron një frymë aspiruse dhe përparimtare për një shoqëri gjithëpërfshirëse të cilën e ndërton mbi bazat e parimeve të lira demokratike, gjithashtu edhe e mbështet deri në fund atë të drejt, thuhet në reagimin e AAK-së.
“Por ne disa raste kornizat gjithëpërfshirese ligjore në vete nuk mjaftojnë për t’i adresuar nevojat e veçanta të çdo grupi të margjinalizuar. Gratë janë grupi më i madh i margjinalizuar në Kosovë. Problemet kryesore me të cilat përballen gratë çdo ditë janë dhe do mbetën njëherësh pengesë për integrim dhe zhvillim. Vazhdojnë të jenë grupi i cenueshëm që rendohet nga dhuna në familje, diskriminim në baza gjinore nga varësia ekonomike e në të njëjtën kohë të privuara nga stereotipet e mentalitetit tonë edhe në të drejtën në trashëgimi”, ka shkruar në qëndrimin e vet AAK-ja.

“Kur bëhet fjalë për personat me aftësi të kufizuara, ata gjithashtu janë në pozitë të pafavorshme derisa ju mungojnë kushtet në infrastrukturë të institucioneve për qasje të lehtë, për mungesat tjera të mos flasim fare. Gratë me aftësi të kufizuara përballen me diskriminim të dyfishtë. Sa i përket kategorisë tjetër, rinisë, edhe kjo kategori është e cenueshme sepse s’po ju kushtohet vëmendje. Kosova ka popullsi më të re në Europë, 50 % e popullatës është nën moshën 25 vjeçe, ndërsa 70 % e popullatës është nën moshën 35 vjeçare. Pra 70 % e rinisë është e papunë, dhe shumë pak të rinj kanë mundësinë ta ngrehin zërin e tyre. Është koha për angazhime dhe veprime konkrete për përmirësimin e të drejtave të njeriut në Kosovë”.

© KOHA. Të gjitha të drejtat janë të rezervuara.