Haliti nuk beson se ndonjë deputet ka qenë në dijeni për murin në Mitrovicë

10 Dhjetor 2016 - 10:39      

Nënkryetari i Kuvendit të Kosovës, Xhavit Haliti thotë se nuk ka qenë në dijeni të ndonjë marrëveshjeje paraprake për murin në Mitrovicë.

Në një deklarim për Radio Dukagjinin, Haliti ka thënë se nuk e beson të ketë qenë në dijeni për këtë as ndonjë deputet tjetër.

“As tani nuk jam i sigurt, nuk e di se si është marrëveshja. Nuk e besoj se e ka ditur asnjë deputet atë detaj. Sidoqoftë ato janë marrëveshje, nëse janë marrëveshje, ato i kanë nënshkruar”,tha Haliti, përcjell ksp.

Xhavit Haliti duke folur në cilësinë e numrit dy të Kuvendit të Kosovës ka ftuar zërat e ndryshëm të shoqërisë dhe organizatave që kanë dalë me qëndrime rreth murit, që t’u besojnë institucioneve të Republikës së Kosovës, Presidentit, Qeverisë dhe Kuvendit, në tejkalimin e kësaj çështjeje deri tek zgjidhja në rrugë zyrtare.

“Në qoftë se ka pasur një marrëveshje dhe nuk prishet ajo marrëveshje, atëherë gjithçka është në rregull. Të dy palët kur bien dakord në Bruksel, atëherë, ato janë marrëveshje ndërkombëtare dhe nuk është lehtë sot të thuash po, e nesër jo”, ka shtuar Haliti, për Radio Dukagjinin.