Vizita në Maternitetin “Nënë Tereza” e kthen prapa Mustafën

9 Dhjetor 2016 - 21:10      

Kreu i ekzekutivit, Isa Mustafa, ka vizituar sot Maternitetin e dikurshëm në Kodrën e Trimave, “Nënë Tereza”.

Ka thënë se kjo vizitë e ktheu “prapa në kohën e vështirë por heroike, të luftës për liri, të cilën e fituam me shumë sakrifica”.

“Sot, shënuam 20 vjetorin e themelimit të këtij Materniteti historik, i cili u themelua dhe veproi nën ombrellën e Shoqatës ‘Nënë Tereza’, në shtëpinë e veprimtarit Shaban Sfirca. Së bashku me Don Lush Gjergjin, doktorin Sejdullah Hoxha dhe shumë punëtorë shëndetësorë dhe qytetarë, vizituam ambientet e Maternitetit, në të cilin gjatë viteve të funksionimit, deri në çlirimin e vendit, u lindën 12 mijë e 500 fëmijë dhe u bënë mijëra ndërhyrje dhe trajtime të tjera shëndetësore”, ka thënë Mustafa.

“Me këtë rast, evokuam kujtimet e asaj epoke të lavdishme të përpjekjeve të popullit të Kosovës të udhëhequr nga Presidenti Historik, Ibrahim Rugova, të cilën e karakterizonte humanizmi, solidariteti dhe rezistenca gjithëpopullore, e kurorëzuar me lirinë e Kosovës”, ka shtuar më tej ai.

© KOHA. Të gjitha të drejtat janë të rezervuara.