Kosova e Hungaria javën tjetër nënshkruajnë një sërë marrëveshjesh

9 Dhjetor 2016 - 16:03      

Prishtinë, 9 dhjetor – Ministri i Punëve të Jashtme i Republikës së Kosovës, Enver Hoxhaj, ka pritur sot ambasadorin e Hungarisë në Kosovë, Laszlo Markusz, me të cilin ka diskutuar për thellimin e bashkëpunimit ekonomik mes dy vendeve dhe aranzhimin final të një sërë marrëveshjesh që do të nënshkruan në këtë fushë gjatë vizitës së ministrit të Punëve të Jashtme dhe Tregtisë së Hungarisë, Péter Szijjártó, javën që vjen.

Ministri Szijjártó do të qëndrojë në Kosovë javën që vjen dhe do të pritet nga ministri i Punëve të Jashtme i Kosovës, Enver Hoxhaj. Ai do të zhvillojë takime edhe me krerët më të lartë të shtetit, presidentin, kryetarin e Kuvendit dhe kryeministrin.

Ministri Hoxhaj e falënderoi ambasadorin Markusz për përkrahjen e Hungarisë në procesin e integrimeve evropiane të Kosovës dhe në shtetndërtimin e brendshëm.

Po ashtu, u diskutuan edhe një sërë çështjesh për forumin e përbashkët ekonomik mes dy vendeve që do të mbahet në muajin prill të vitit të ardhshëm.

Në këtë takim të dy palët u dakorduan që vitin e ardhshëm të realizohet një takim i komisionit të përbashkët për bashkëpunim ekonomik mes Kosovës dhe Hungarisë. 

© KOHA. Të gjitha të drejtat janë të rezervuara.