Kamberi thotë se serbët po duan që në mur të vendosin emrat e “viktimave nga terroristët shqiptarë”

8 Dhjetor 2016 - 23:35      

Safet Kamberi, deri dje nënkryetar i Komunës së Mitrovicës, si pjesë e koalicionit që partia e tij LDK ka pasur me AKR-në e Behxhet Pacollit, ka thënë se në Mitrovicë ka qarkulluar edhe një informatë rreth murit në anën veriore të qytetit.

“Shumë informata janë dhënë në lidhje me murin këtyre ditëve, por më e keqja është se serbët po duan që në të t’i vendosin emrat e personave të vrarë, kinse nga terroristët shqiptarë. Ky do të ishte një provokim i rëndë për shqiptarët dhe nuk do t’i kontribuonte aspak relaksimit të situatës në integrimin e qytetit”, ka thënë Kamberi.

“Këto janë informata të pavërtetuara, por ky do të ishte një lajm io keq dhe do të ishte një provokim jashtëzakonisht i madh për qytetarët e Mitrovicës por edhe për Kosovën në përgjithësi. Një gjë të tillë nuk duhet ta lejonin institucionet e Kosovës e as ato të BE-së”, ka thënë Kamberi.

Ai ka thënë se kanë qenë të kënaqur me atë që është pa që është duke u punuar deri para pak ditësh.
“Komuna e Mitrovicës Veriore ka nisur edhe një projekt tjetër, dhe ne kemi parë murin, i cili është një vepër e shëmtuar dhe është e papranueshme për qytetarët e Mitrovicës. Gjatë ditës ne kemi parë edhe angazhimin e kryeministrit dhe qeverisë, dhe besojmë se në bashkëpunim me BE-në do të stopohet ndërtimi i atij muri dhe do të kthehet në gjendje normale”, ka thënë ai.

Kamberi thotë se reagimi i Qeverisë së Kosovës kundër murit të ndërtuar në urën e Ibrit ka qetësuar situatën me tensione që ekziston atje.

“Shihet se situata është e qetë, por ka tensione për murin që është ndërtuar aty. Por reagimi i qeverisë ka ndikuar në qetësimin e situatës atje”, ka thënë Kamberi.

© KOHA. Të gjitha të drejtat janë të rezervuara.