Veseli nderon viktimat e terrorizmit në Paris

8 Dhjetor 2016 - 14:44      

Kryetari i Kuvendit të Kosovës, Kadri Veseli, i cili ndodhet për një vizitë zyrtare në Paris, bëri sot homazhe dhe vendosi lule në memorialin pranë Teatrit Bataclan, për t’i nderuar viktimat e sulmit terrorist të nëntorit të vitit 2015, që përgjakën Parisin dhe tronditën Botën.

Kryeparlamentari Veseli tha Kosova solidarizohet me Francën, ndërsa shprehu përkushtimin e plotë të shtetit të Kosovës për luftë kundër terrorizmit.

"Sot u përkulëm te vendi ku ranë viktimat e terrorit, vitin e kaluar, në Paris. Shprehim keqardhjen tonë dhe solidarizohemi me familjet e viktimave dhe popullin e Francës. Ne ndajmë vlerat e njëjta si Republikë e Kosovës dhe jemi aleatë në luftën kundër terrorizmit", tha kryeparlamentari Veseli.

Veseli, po ashtu, u shpreh se sulmi në Paris ka bërë që e gjithë bota demokratike të bashkohet dhe t’i intensifikojë përpjekjet në luftën kundër të së keqes.

© KOHA. Të gjitha të drejtat janë të rezervuara.