Pas barrikadës dhe “parkut” në urë, tash mur në Mitrovicë [video]

7 Dhjetor 2016 - 19:02      

Shumë qytetarë kanë marrë rrugën të mërkurën deri mbi urën e lumit Ibër për të parë nga afër murin e ndërtuar në fillim të rrugës në Mitrovicën veriore, raporton KTV.

Rivitalizimi i urës ka nisur në muajt e verës, duke larguar kështu të ashtuquajturin Park i Paqes, i vendosur nga serbët pas largimit të barrikadës këtu.
Punimet në këtë mur kanë nisur para rreth një jave, por tek të mërkurën ka nisur zbulimi i tij.

Asamblistët shqiptarë të Komunës së Veriut janë shprehur të befasuar me murin, duke shtuar se nuk është diskutuar.

Kryetari i Mitrovicës veriore, Goran Rakiq, ka thënë për KTV-në se kjo është pjesë e projektit.

Por, në Prishtinë është mohuar se muri është pjesë e projektit, për të cilin palët janë marrë vesh në Bruksel.

Ministrja Edita Tahiri ka mbajtur takim urgjent për rastin, duke e cilësuar këtë si ndërtim pa leje, i cili do të rrënohet dhe që është veprim që destabilizon vendin.

“Kjo do të ndodhë së shpejti sapo të realizohen procedurat ligjore për ndërtime ilegale”, i ka thënë KTV-së ministrja Tahiri.

© KOHA. Të gjitha të drejtat janë të rezervuara.