“Suedia, partner i rëndësishëm në rrugën evropiane të Kosovës”

7 Dhjetor 2016 - 17:29      

Kryeministri i Republikës së Kosovës, Isa Mustafa, priti ambasadorin e parë rezident të Mbretërisë së Suedisë në Kosovë, Henrik Nilsson, njofton kumtesa nga Kryeministria, transmeton Koha.net.

Gjatë takimit, u bisedua për mundësitë e thellimit të bashkëpunimit dhe mbështetjes së Suedisë për Kosovën.

Mustafa vlerësoi lartë faktin se tashmë Suedia përfaqësohet me ambasador rezident në Kosovë, duke shprehur mirënjohjen e Qeverisë dhe të qytetarëve të Kosovës për mbështetjen e vazhdueshme të Suedisë.

“Suedia me përkrahjen e saj të shumanshme për qytetarët e Kosovës është shndërruar në një prej shteteve partnere shumë të rëndësishme në rrugën evropiane të Kosovës”, tha Mustafa.

Ambasadori i Suedisë në Kosovë, Henrik Nilsson, theksoi përkushtimin e mëtejmë të Suedisë dhe vullnetin për zgjerimin e bashkëpunimit ndërmjet dy shteteve.

Ambasadori Nilsson, po ashtu, vlerësoi të arritura e deritashme dhe perspektivën zhvillimore të Kosovës.

© KOHA. Të gjitha të drejtat janë të rezervuara.