UNDP e IOM mbshtesin MPB-në kundër dukurive negative transnacionale

5 Dhjetor 2016 - 15:32      

Prishtinë , 5 dhjetor - Ministri i Punëve të Brendshme të Republikës së Kosovës, Skender Hyseni, priti sot koordinatorin e OKB-së për zhvillim dhe njëherit përfaqësuesin rezident të UNDP-së, z. Andrew Russell, si dhe shefen e Misionit të IOM-it në Kosovë, Tajma Kurt, me të cilët biseduan për bashkëpunimin që këto dy organizata i kanë ofruar Ministrisë së Punëve të Brendshme në adresimin e migrimit, trafikimit me qenie njerëzore, si dhe radikalizmit e ekstremizmit të dhunshëm.

Njëkohësisht u bisedua për projektet që pritet të realizohen në vitin e ardhshëm, e që synojnë të rrisin përpjekjet e MPB-së për të parandaluar këto dukuri negative të karakterit transnacional.

Të gjithë u ndanë të pajtimit se projektet e përbashkëta të realizuara tashmë, si dhe serioziteti i institucioneve të Kosovës në përballjen me këto dukuri kanë dhënë fryte të shumta, siç edhe janë vënë në dukje shpeshherë nga raporte të shumta ndërkombëtare.