AGK: Prokuroria e Shtetit kërcënoi mediet, veprim i papranueshëm

4 Dhjetor 2016 - 11:57      

Asociacioni i Gazetarëve të Kosovës reagon ndaj kërcënimit që prokuroria e shtetit iu ka bërë medieve, sot kur po zhvillohet procesi zgjedhor në Drenas.

Paralajmërimi në formë kërcënimi nga ky institucion, thotë kumtesa nga AGK, paraqet shqetësim serioz për mediet dhe gazetarët. Kërcënimi se “do të merren masa konkrete në rastet e dezinformimit apo informimit të rrejshëm përmes portaleve dhe rrjeteve sociale” është presion mbi mediet dhe qytetarët që të shprehen lirshëm, e drejtë kjo e garantuar me Kushtetutën e Republikës së Kosovës, transmeton Koha.net.

Lexoni edhe: Prokurori i Shtetit në përcjellje të zgjedhjeve në komunën e Drenasit

AGK e konsideron të papranueshme këtë qasje të Prokurorisë së Shtetit, ndërkohë që i bëjmë thirrje këtij institucioni që të angazhohet më shumë në rritjen e bashkëpunimit me mediet si dhe krijimin e transparencës së nevojshme.

AGK-ja , përfundon kumtesa, mbështet në punën e tyre kolegët gazetarë të cilët janë duke mbuluar zgjedhjet për kryetar të komunës së Drenasit. 

© KOHA. Të gjitha të drejtat janë të rezervuara.