Haradinaj në konventën e LSI-së: Faktori politik shqiptar duhet të jetë unik

3 Dhjetor 2016 - 15:10      

Kryetari i AAK-së, Ramush Haradinaj bashkë me nënkryetarët, Pal Lekaj e Ahmet Isufi, kryetaren e rinisë së AAK-së, Diellza Hoti dhe bashkëpunëtorë të tjerë, më ftesë të kryetarit Ilir Meta, sot ka marrë pjesë si mysafir nderi në Konventën Kombëtare të Lëvizjes Socialiste për Integrim.

Kryetari Haradinaj i është drejtuar me një fjalë rasti të pranishmëve, duke e përshëndetur konventën dhe strukturat udhëheqëse të LSI-së.

Sipas njoftimit për media të AAK-së, Haradinaj aty ka theksuar po ashtu se faktori politik shqiptar duhet të jetë unik për të qenë ndikues në zhvillime pozitive e të jetë i pathyeshëm në mbrojtje të qytetarëve shqiptarë, në mbarë botën kudo ku jetojnë ata.

“Të arriturat tona të ndërsjella na ndihmojnë që të jemi bashkë e të fortë drejtë synimeve tona në integrimet euroatlantike”, citohet të ketë thënë Haradinaj.

© KOHA. Të gjitha të drejtat janë të rezervuara.