Vazhdojnë mbështetjen për bashkimin e ATK-së dhe Doganës së Kosovës

2 Dhjetor 2016 - 12:02      

Ministri i Financave Avdullah Hoti i shoqëruar edhe nga ekspertët e Grupit Koordinues për procesin e bashkimit të Administratës Tatimore dhe Doganës së Kosovës, sot mbajtën takimin e dytë me radhë me bashkëpunëtorët strategjik dhe zhvillimor të Qeverisë së Republikës së Kosovës, përfaqësuesit e Fondit Monetar Ndërkombëtar, përfaqësuesit e GIZ-it, përfaqësuesit e Zyrës së Bashkimit Evropian në Kosovë, Ambasadës Angleze, USAID-it si dhe me përfaqësuesit e partnerëve tjerë strategjik.

Në këtë takim, njofton kumtesa ministrore, u diskutua për procesin e arritur deri më tani në bashkimin e Administratës Tatimore të Kosovës dhe Doganës në një institucion të vetëm, si dhe planet dhe objektivat për të ardhmen, transmeton Koha.net.
Me këtë rast, falënderoj të gjithë përfaqësuesit e donatorëve për mbështetjen e deritanishme në kuadër të këtij procesi, ku sipas tij me ndihmën dhe bashkëpunimin e gjithë donatorëve është arritur një progres i madh, siç është edhe përgatitja e Projektligjit për Agjencinë e të Hyrave, i cili Projektligj tashmë është proceduar për miratim në Qeveri.

Ndërsa, përfaqësuesit e institucioneve ndërkombëtare, edhe njëherë shprehën gatishmërinë e tyre për të vazhduar mbështetjen dhe kontributin e tyre për Qeverinë e Republikës së Kosovës në procesin e krijimit të Agjencisë së të Hyrave, sidomos në fushat specifike të cilat janë potencuar nga Grupi Koordinues për procesin e bashkimit të Administratës Tatimore dhe Doganore.