Vetëvendosje nuk do komisione që nuk respektojnë argumentet e ekspertëve për kufirin

1 Dhjetor 2016 - 12:15      

Deputetja e Vetëvendosjes Albulena Haxhiu, duke folur për propozimin e kryeministrit të vendit Isa Mustaaf që të krijohet një komision për matjen e territorit të Kosovës me qëllim që t’i hapet rrugë ratifikimit të Marrëveshje për demarkacion Kosovë – Mali i Zi, për Koha.net, ka thënë se problemet nuk zgjidhen me komisione por me respektimin e vijës kufitare.

Procesi i negociimit të vijës kufitare mes Kosovës dhe Malit të Zi ka mohuar tërësisht secilin kriter të përcaktuar sipas të drejtës publike ndërkombëtare, ka thënë Haxhiu.

Deputetja e Vetëvendosjes ka shtuar se ky proces ka mohuar edhe secilin kriter që do të duhej të ishte i përdorshëm në këtë rast, e që do të siguronte që shenjimi i vijës kufitare të ishte në përputhje me të drejtën ndërkombëtare dhe me parimin e respektimit të ndërsjellë të kufijve ndërkombëtar mes dy vendeve.
Komisioni shtetëror i Republikës së Kosovës ishte mandatuar ta shenjojë vijën kufitare mes Kosovës dhe Malit të Zi e jo ta caktojë një kufi të ri. Ky proces negociimi ka caktuar kufi të ri, i cili është në dëm të integritetit territorial të Republikës së Kosovës, , ka thënë ajo.

Sipas Haxhiut vija kufitare duhet rinegociuar.
“Nuk zgjidhet problemi me komisione ad hoc që masin territorin, por me komision që e merr përsipër rishtazi shenjimin e vijës kufitare duke i marrë për bazë të gjitha argumentet dhe faktet e reja të zbardhura nga ekspertët vendor që e kanë ngritur këtë çështje, ku do të përfshiheshin edhe ata vet, si dhe një komision hetimor që do ta hetonte punën e Komisionit të Murat Mehës për ta përcaktuar qartë përgjegjësinë në shkeljet eventuale procedurale, të mandatit të komisionit si dhe ato penale nëse ka”, thënë Albulena Haxhiu për Koha.net.

© KOHA. Të gjitha të drejtat janë të rezervuara.