Pse gjykatësit nuk po i duan gazetarë në sallë [video]

30 Nëntor 2016 - 19:17      

Gjykimi për një prej skandaleve më të mëdha në vend në shëndetësi, për gazetarët ka zgjatur vetëm pak minuta, raporton KTV.

Gjyqtarja Shadije Gërguri, para se të nisë seanca në rastin “Stenta” kishte vendosur që medieve t’u lejoheshin shkurt vetëm filmimet, e më pas të largohen nga salla duke u arsyetuar me mungesën e vendeve në sallë dhe me numrin e madh të të akuzuarve.

Mediat, nuk janë lejuar të qëndrojnë as në hapësirat brenda Gjykatës.

Zhvillimet brenda procesit gjyqësor që tani njihet si “Stenta”, nuk ishin të vetmet që u mbajtën larg publikut këtë ditë, pasi që edhe seanca ndaj ish-kryetarit të Gjykatës së Apelit, Sali Mekajt dhe tre të akuzuarve të tjerë, mbeti e mbyllur.

Pavarësisht reagimeve e kritikave, ka mbetur në fuqi vendimi i gjyqtarit Shasivar Hoti, që mbylli për publikun e mediat, seancat ndaj Mekajt, që akuzohet për shpërdorim të detyrës zyrtare.
Me shqetësim për zhvillimet në të dy rastet, AGK-ja sërish ka reaguar duke i quajtur veprimet si të papranueshme.
Asociacioni i Gazetarëve të Kosovës iu ka bërë thirrje të dy gjykatësve të rasteve në fjalë, si dhe Gjykatës Themelore, që të ndërmarrin veprime të menjëhershme duke garantuar transparencë në drejtësi.

AGK-ja konsideron se mungesa e transparencës krijon hapësirë për spekulime dhe motivon sinjalizuesit e brendshëm të rrjedhin dokumente nga gjykata.

Pse gjykatësit nuk po i duan gazetarë në sallë by kohanet

© KOHA. Të gjitha të drejtat janë të rezervuara.