AAK dënon sulmin ndaj Konsullatës turke në Prizren

29 Nëntor 2016 - 12:40      

Aleanca për Ardhmërinë e Kosovës përmes një komunikate për media ka reaguar rreth sulmit të djeshëm kundër Konsullatës turke në Prizren, duke thënë se një akt i tillë është kundër interesave të shtetit, transmeton Koha.net.

“AAK shpreh shqetësimin e saj të thellë me rastin e incidentit me Konsullatën turke në Prizren. Ky është një akt, rëndë i dënueshëm, dhe i orientuar njëkohësisht edhe kundër interesave të shtetit të Kosovës”, thuhet në komunikatë.

Marrëdhëniet miqësore me Turqinë, sikundër edhe me çdo shtet tjetër me të cilin kemi marrëdhënie diplomatike, janë përcaktim yni dhe ato duhet të trajtohen si të tilla, thotë AAK.

“Njëkohësisht, institucionet dhe shteti i Kosovës, e ka për obligim që të sigurojë ambient të qetë dhe të sigurt për funksionimin normal të përfaqësive diplomatike në Kosovë, në këtë kuadër edhe për Konsullatën turke. Ne besojmë fuqishëm që organet e rendit do ta zbardhin këtë rast, do t’i nxjerrin para drejtësisë autorët e sulmit dhe njëkohësisht shprehim shpresën se ky incident nuk do të mund t’i dëmtojë marrëdhëniet tona me Turqinë”, thotë AAK.

© KOHA. Të gjitha të drejtat janë të rezervuara.