Për Nikoliqin, kopjimi i AKS-së si të Kosovës për autonomi esenciale shkelka kushtetutën

29 Nëntor 2016 - 12:19      

“Për asnjë shtet tjetër që na rrethon, as për pjesët e tjera të territorit të Serbisë, nuk ka negociata për autonomi thelbësore. Kështu që të gjitha përpjekjet për kopjimin e AKS-së (Asociacionit të Komunave Serbe) me këtë vështrim do të çonin në shkeljen e rendit kushtetues të atyre vendeve”, i ka thënë presidenti i Serbisë, Tomisllav Nikoliq gazetës “Veçernje novosti” të Beogradit.

“Për AKS-në po bisedohet në territorin e Kosovës e Metohisë, për të cilin parashihet autonomia esenciale dhe këtu Serbia po merr pjesë sinqerisht”, ka sqaruar presidenti serb, transmeton Koha.net.

Ai ka shtuar se është i mundshëm bashkëpunimi i administratave lokale në shtet, por është i mundur edhe bashkëpunimi jashtë kufijve në përputhje me kushtetutat e qeverive të vendeve në të cilat zhvillohet bashkëpunimi.

Qytetet Tirana, Prishtina, Tetova, Ulqini dhe Presheva kanë formuar Unionin e Komunave Shqiptare në rajon, pra për herë të parë “është formuar unioni i komunave kryesore në rajon që drejtohen nga shqiptarë” dhe ky asociacion ka për qëllim ndërtimin e mekanizmave të nevojshme për bashkëpunim të ndërsjellë, thekson kjo gazetë. Ajo shton se në platformën e tyre parashihet bashkëpunimi në fushën e urbanizmit, mjedisit jetësor, kulturës, investimeve dhe inovacione.  

© KOHA