“Në ATK, punësimet janë kryesisht nepotiste dhe politike”

28 Nëntor 2016 - 21:19      

Remzi Ismajli, i ftuar në emisionin “Puls” të KTV-së, duke folur për ish-vendin e tij të punës në ATK, ka përmendur edhe çështjen e punësimeve në këtë agjencion.

Ai ka thënë se në ATK, këto punësime bëhen në baza nepotiste, por më shumë në baza politike.

“Nga tre kandidatët për t’u përzgjedhur drejtor, ata ishin nga një parti politike dhe në fund u zgjodh njëri, pra fitoi njëri prej tyre. Pastaj, nëse e shohim rangun më poshtë, atë të drejtorëve dhe menaxherëve, shumica janë politikë”, theksoi ai, raporton Koha.net.

Ai tha se e ka lënë punën në ATK-në para tre muajve “për shkak të këtyre parregullsive që i përmenda deri më tash, siç janë transferimet herë andej herë këndej, prej një vendi në një vend”.

“Nga 700 punëtorë sa i ka ATK-ja, brenda 4 viteve mbi 200 punëtorë janë transferuar nga një vend tek vendi tjetër”, tha më tej ai.

Ismajli përmendi edhe evazionin fiskal që ndodh në vendet tjera, duke thënë se “në Serbi është 10%, Bullgari 8%, ndërsa në Kosovë është diku rreth 35%”.

© KOHA. Të gjitha të drejtat janë të rezervuara.