Gjermania përkrah dialogun Kosovë-Serbi, ndihmon stabilitetin në rajon

23 Nëntor 2016 - 16:03      

Prishtinë, 23 nëntor - Ministrja për Dialog e Qeverisë së Kosovës, Edita Tahiri, së bashku me zëvendësministrin e Punëve të Jashtme, Valon Murtezaj, zhvilluan sot një takim me Christian Hellbach, drejtor për Evropë Juglindore në Ministrinë e Punëve të Jashtme të Gjermanisë. Në këtë takim ishte prezent edhe ambasadorja gjermane në Kosovë, Angelika Viets.

Në ketë takim, që ishte drekë pune, të dy palët vlerësuan lart marrëdhëniet e shkëlqyera mes Republikës së Kosovës dhe Republikës Federale të Gjermanisë. Ministrja Tahiri falënderoi diplomatin gjerman për mbështetjen e dhënë nga ana e Gjermanisë për Kosovën në rrugën e saj drejt integrimit euroatlantik.
Bëhet e ditur se në këtë takim u bisedua edhe për dialogun e Brukselit. Diplomati gjerman me ketë rast tha se Gjermania e mbështet këtë dialog dhe se zbatimi i marrëveshjeve duhet të bëhet pasi që ky dialog ndihmon edhe në ruajtjen e paqes dhe stabilitetit në rajon, si dhe në të njëjtën kohë ndihmon integrimin e komunitetit serb në institucionet e Republikës së Kosovës.