Hoxhaj në samitin e Frankofonisë, pret njohje të reja

23 Nëntor 2016 - 10:33      

Antananarivo, 23 nëntor – Ministri i Punëve të Jashtme i Republikës së Kosovës, Enver Hoxhaj, ka takuar sot sekretaren e Organizatës së Frankofonisë, Michaëlle Jean, në Madagaskar ku po merr pjesë në samitin e Frankofonisë.

Kryediplomati Hoxhaj gjatë këtij takimi ka biseduar për bashkëpunimin e ngushtë në mes të Frankofonisë dhe Kosovës. Sipas njoftimit për medie, ai e ka njoftuar sekretaren për synimin e Kosovës për t’u bërë shtet anëtar edhe në Agjensionin e Universiteteve Frankofone dhe në Asamblenë Parlamentare të Frankofonisë.

“Kam biseduar për bashkëpunimin e ngushtë në mes të Frankofonisë dhe Kosovës nga koordinimi për çështje të politikës së jashtme, e deri tek bashkëpunimi ekonomik, arsimor dhe kulturor. Sekretares i thashë që Kosova synon që të bëhet anëtare në Agjensionin e Universiteteve Frankofone dhe në Asamblenë Parlamentare të Frankofonisë”, ka thënë Hoxhaj.

Ministri Hoxhaj po ashtu e ka informuar sekretaren Jean për zhvillimet dhe të arriturat e Kosovës dhe ka kërkuar mbështetjen për njohje të reja për Kosovën.

Bëhet e ditur se Hoxhaj sot ka zhvilluar takim edhe me ministren kanadeze për zhvillim ekonomik, Francine Landry, me të cilën kanë biseduar për bashkëpunimin ekonomik mes dy vendeve dhe mundësinë e projekteve konkrete të përbashkëta nga të cilat do të përfitojnë qytetarët e Kosovës.

Një ditë më herët Hoxhaj ka takuar edhe ministrat e jashtëm të Belgjikës, Xhibutit dhe Burundit, ndërsa do të vazhdojë me agjendën e tij lobuese.

Kosova është anëtarësuar në Organizatën e Frankofonisë në vitin 2014 si shtet anëtar vëzhgues.
 

© KOHA. Të gjitha të drejtat janë të rezervuara.