“Neglizhencat” që çuan në vdekjen e Astrit Deharit [video]

22 Nëntor 2016 - 19:02      

Tetëmbëdhjetë ditë i janë dashur Inspektoratit të Ministrisë së Drejtësisë që të marrë vendim për suspendimin e zyrtarëve të Qendrës së Paraburgimit në Prizren, për rastin e vdekjes së aktivistit të Vetëvendosjes Astrit Dehari, raporton KTV.

Në njoftimin e Ministrisë dërguar medieve, thuhet se Inspektorati gjatë inspektimit nuk ka gjetur asnjë veprim të institucionit, i cili në çfarëdo mënyre do të ishte nxitës apo shkaktar i vdekjes së Astrit Deharit, porse janë identifikuar disa neglizhenca procedurale.

Derisa Ministria e Drejtësisë ka kërkuar hetime të pavarura për rastin nga Britania, kërkesë kjo që i është bërë Ambasadës Britanike në Kosovë, familja e të ndjerit Astrit Dehari e quan këtë kërkesë të ministres Dhurata Hoxha, të papranueshme përderisa nuk është konsultuar me familjen.

Sipas familjes Dehari, kërkesa e ministres Hoxha është “pranim i saj për papërgjegjësinë dhe për paaftësinë e kësaj Qeverie dhe të institucioneve shtetërore për ta zbardhur rastin dhe zbuluar shkaktarin e vdekjes së djalit tonë”.

“Pa dorëheqjen e ministres Hoxha dhe ministrit Hyseni dhe pa ndërprerjen e hetimeve aktuale, ne, si familje Dehari, nuk pajtohemi për hetime ndërkombëtare, pavarësisht vlerësimit të lartë që kemi dhe reputacionit të lartë që ka Scotland Yard”, thuhet tutje në këtë letër.

© KOHA. Të gjitha të drejtat janë të rezervuara.