Drejtori i Burgut të Prizrenit suspendohet, masa disiplinore ndaj treve

22 Nëntor 2016 - 13:11      

Prishtinë, më 22 nëntor - Inspektorati i Ministrisë së Drejtësisë, gjatë inspektimit, nuk ka gjetur asnjë veprim të institucionit, i cili në çfarëdo mënyre do të ishte nxitës apo shkaktar i vdekjes së Astrit Deharit, por janë identifikuar disa neglizhenca procedurale, thuhet në kumtesën për medie të Ministrisë së Drejtësisë rreth rastit Dehari.

Inspektorati i Ministrisë së Drejtësisë, gjatë zbatimit të procedurës së inspektimit, në pajtim me detyrat dhe obligimet e veta ligjore, ka dërguar raportin e inspektimit të procedurave të ndjekura me rastin e vdekjes së të burgosurit, Astrit Dehari.

Inspektorati gjatë inspektimit nuk ka gjetur asnjë veprim të institucionit, i cili në çfarëdo mënyre do të ishte nxitës apo shkaktar i vdekjes së A.D., edhe pse janë identifikuar disa neglizhenca procedurale.

Si pasojë e këtyre neglizhencave janë iniciuar procedurat disiplinore ndaj një zyrtari korrektues, dy mbikëqyrësve si dhe ushtruesit të detyrës së drejtorit (bëhet fjalë për Destan Zogaj, sqarim i redaksisë), të cilit po ashtu i është shqiptuar edhe masa e suspendimit si masë paraprake.

© KOHA. Të gjitha të drejtat janë të rezervuara.