Hoxha s’e ka ndërmend t’i përgjigjet Kuvendit për raportim në rastin Dehari

21 Nëntor 2016 - 20:40      

Komisioni për Parlamentar për Legjislacion është mbledhur sot, ndër të tjera edhe për të kërkuar që kryeprokurori i Prokurorisë Themelore në Prizren, Sylë Hoxha, si dhe ministrja e Drejtësisë, Dhurata Hoxha, të raportojnë rreth rastit Dehari.

KTV ka kontaktuar me kryeprokurorin e Prizrenit, Sylë Hoxha, i cili ka thënë se nuk e ka ndërmend t’i përgjigjet ftesës së këtij komisioni për të raportuar lidhur me rastin Dehari.

Kjo pasi që sipas Hoxhës është ndërhyrje e drejtpërdrejtë në sistemin e pavarur të drejtësisë.

Ishte kryeprokurori Sylë Hoxha ai që para pak ditësh doli në konferencë për media, për të theksuar se Astrit Dehari, aktivist i Lëvizjes Vetëvendosje vdiq nga mbyllja e kanaleve të frymëmarrjes të shkaktuara nga vet ai me mjet të fortë, raporton Koha.net.

Familja Dehari përmes avokatit, Tomë Gashi si dhe lëvizja Vetëvendosje nuk po i besojnë këtij varianti, duke insistuar se bëhet fjalë për vrasje të dhunshme për 26 vjeçarin që vdiq në Qendrën e Paraburgimit në Prizren, ditën e 5 nëntorit, kur kishte 68 ditë që po qëndronte si pjesë e një grupi prej 6 personash të dyshuar për një sulm me zolë ndaj Kuvendit të Kosovës.

© KOHA. Të gjitha të drejtat janë të rezervuara.