Akuza, fyerje e tension në Kuvend për rastin Dehari [video]

21 Nëntor 2016 - 19:02      

U mblodhën për të diskutuar se si do ta ftonin kryeprokurorin e Prizrenit, Sylë Hoxha, dhe ministren e Drejtësisë, Dhurata Hoxha, për raportim rreth rastit Dehari, por mbledhja e Komisionit Parlamentar për Legjislacion kaloi me shumë tensione dhe akuza, saqë nuk arritën fare te kjo pikë.

Deklaratat e kryetares së këtij komisioni, Albulena Haxhiu, drejtuar institucioneve të shtetit për ‘vrasjen e Deharit” nxitën reagimin e Armend Zemajt të LDK-së.

Ai akuzoi Vetëvendosjen se ishte shtytëse që Dehari të kryente vetëvrasje, raporton KTV.

E, debati i ashpër i zhvilluar mes Zemajt dhe Haxhiut bëri që të gjithë anëtarët e komisionit të partive politike të largohen nga kjo mbledhje.

Për deputetin e LDK-së është keqardhje se si rasti i Deharit po përdoret për politikë.

Debati i kryetares së këtij komisioni, Albulena Haxhiu, vazhdoi edhe me deputeten e PDK-së, Selivje Halimi.

KTV ka kontaktuar me kryeprokurorin e Prizrenit. Sylë Hoxha, i cili ka thënë se nuk e ka ndërmend t’i përgjigjet ftesës së këtij komisioni për të raportuar lidhur me rastin Dehari. Kjo pasi që sipas Hoxhës është ndërhyrje e drejtpërdrejtë në sistemin e pavarur të drejtësisë.

© KOHA. Të gjitha të drejtat janë të rezervuara.