Hyseni në Gjermani kërkon përkrahje për në Interpol e liberalizim vizash

21 Nëntor 2016 - 16:35      

Ministri i Punëve të Brendshme i Republikës së Kosovës, Skënder Hyseni po qëndron për vizitë në Republikën Federale të Gjermanisë. Sot, në Berlin ai ka zhvilluar një takim përmbajtjesor me anëtarë të Komisionit për Siguri në Bundestagun gjerman.

Një takim të veçantë Ministri Hyseni ka zhvilluar në Ministrinë e Punëve të Brendshme me Emily Haber, Sekretare e Shtetit.

Në të dyja takimet është biseduar për një varg çështjesh të interesit të ndërsjellë dhe në funksion të forcimit të mëtejmë të marrëdhënieve bilaterale Kosovë-Gjermani, në fushën e sigurisë. Ndonëse, ishte konstatim i përbashkët se Partneriteti strategjik midis Kosovës dhe Gjermanisë në rrafshin e sigurisë dhe rendit e ligjit është i qëndrueshëm, u trajtuan modalitete dhe projekte të ndryshme të avancimit të mëtejmë të bashkëpunimit.

Në këto takime në mënyrë të veçantë u trajtua çështja e heqjes së vizave për qytetarët e Kosovës. U theksua s Kosova duhet të përmbush edhe kriteret e mbetura.

Ministri Hyseni kërkoi përkrahjen e mëtejme të Gjermanisë edhe sa i përket anëtarësimit të Kosovës në INTERPOL dhe avancimit të bashkëpunimit me Europol-in, si dy mekanizma të rëndësishëm ndërkombëtar të bashkëpunimit policor.

© KOHA. Të gjitha të drejtat janë të rezervuara.