Pas çdo fatkeqësie natyrore bëhen vetëm vlerësime të dëmeve, asgjë tjetër [video]

20 Nëntor 2016 - 20:18      

Çdo herë pasi bie shi e bëhen vërshime, përpilohen raporte me vlerësime të dëmeve të shkaktuara.

Por asgjë nuk shkon më larg se kaq. Vlerësimet mbeten vetëm në letër.

Janë shumë bujq e vreshtarë që janë ankuar nga dëmet e vërshimeve dhe breshrit, raporton KTV.

Vetëm këtë vit, në komunën e Rahovecit janë evidentuar dëme nga vërshimet në vlerë prej rreth 1 milion eurove në sektorin e bujqësisë. Ndërsa edhe një milion të tjera në vreshtari.

Zyrtarë të kësaj komune thonë se vetëm këtë vit, katër herë radhazi, bujqit kanë pësuar në perimtari, grurë e amvisëri, por që nuk kanë pasur mundësi t’u ndihmojnë.

Dëme në vlerë prej 100 mijë eurove janë shkaktuar edhe në Komunën e Malishevës, por që qeveria atyre ua ka kompensuar vetëm 20 përqindëshin e shumës totale.

Ministria e Bujqësisë ka pranuar të gjitha raportet nga i gjithë vendi për dëmet e shkaktuara.

Në bazë të vlerësimit, shuma e dëmeve të shkaktuara nga vërshimet arrin mbi 2 milionë euro. Kjo ministri brenda pak ditësh planifikon t’ia dorëzojë raportin Qeverisë për të ndarë një pjesë të mjeteve.

© KOHA. Të gjitha të drejtat janë të rezervuara.