Ministria e Drejtësisë i drejtohet britanikëve për hetim të pavarur të rastit Dehari

20 Nëntor 2016 - 12:50      

Ministria e Drejtësisë tashmë është drejtuar edhe zyrtarisht Ambasadës Britanike në Prishtinë me një kërkesë për të kryer një hetim të pavarur lidhur me vdekjen në burg të aktivistit të Vetëvendosjes Astrit Deharit.

Zëdhënësi i kësaj ministrie Orhan Hajrizi ka konfirmuar për KTV se ende nuk kanë marrë një përgjigje nga ambasada e Britanisë për këtë kërkesë të dërguar.

“Presim në ditët në vijim që të diskutojmë së bashku me ambasadorin britanik në lidhje me këtë kërkesë. Ambasada Britanike është njëri ndër partnerët e rëndësishëm që mbështesin Ministrinë e Drejtësisë sidomos Institutin për Mjekësi Ligjore prandaj besojmë që edhe në kërkesën tonë që të gjejmë mirëkuptim” ka thënë Hajrizi, transmeton Koha.net.

Ai më tutje ka theksuar ekziston baza ligjore që shteti i Kosovës të lejojë një hetim të tillë.

Rezultatet e autopsisë të Mjekësisë Ligjore në Prishtinë kanë konstatuar se Dehari kishte vdekur nga lëndimet e vetshkaktuara.

Kryeprokurori i Prizrenit ka konstatuar se anëtari i Vetëvendosjes bëri vetëvrasje, por, ende nuk janë sqaruar motivet. Ndërkohë lëvizja Vetëvendosje ka kontestuar gjetjet e Mjekësisë Ligjore.

© KOHA. Të gjitha të drejtat janë të rezervuara.