Interkonjeksionin Shqipëri – Kosovë po e bllokon Serbia

18 Nëntor 2016 - 15:35      

Serbia po bllokon vënien ne punë të linjës së interkonjeksionit mes Shqipërisë dhe Kosovës. Ministri i Energjisë, Damian Gjinkuri deklaroi se Qeveria do të kërkojë ndihmën e fuqive europiane për të zgjidhur krizën.

“Fatkeqësisht, për arsye politike kjo linjë akoma nuk është vënë në funksionim me gjithë lobimin tonë dhe përpjekjet tona. Unë mund të përfitoj nga rasti dhe jam i sigurt se kryeministri Rama do ta bëjë të njëjtën gjë në Berlin kur të takojë kancelaren Merkel, që na duhet që ky proces të përfundojë siç duhet dhe kjo linjë të jetë funksionale”, thotë ai.
Linja e interkonjeksionit me Kosovën kushtoi 42 milionë euro. Por edhe pse ka përfunduar prej disa muajsh ajo nuk funksionon sepse Serbia nuk njeh Operatorin e Transmetimit të Kosovës. Ngërçi ka shqetësuar Bashkimin Europian, transmeton tch.

“Bashkimi Europian po pret që linja 400 kilovolt mes Shqipërisë dhe Kosovës të bëhet operacionale sa më shpejtë që të jetë e mundur sepse kjo do të përmirësonte edhe cilësinë e ajrit në Kosovë duke e bërë atë më pak të varur nga energjia e qymyrit”, deklaroi Jan Rudolf, i ngarkuari i BE me punë në Tiranë.