Avokati Gashi: Nuk po lejohet qasja në të gjitha provat për vdekjen e Astrit Deharit

18 Nëntor 2016 - 12:37      

Avokati i familjes Dehari, Tomë Gashi, ka deklaruar se ekspertët e angazhuar nga familja nuk po lejohen të kenë qasje në të gjitha provat, për të dhënë mendimin përfundimtar rreth shkaqeve të vdekjes së Astrit Deharit në qendrën e paraburgimit në Prizren, raporton KTV.

Në një konferencë për media, avokati Gashi ka thënë se provat po ua ndalon Prokurori i Shtetit.
Ndërsa, deputetja e Vetëvendosjes Albulena Haxhiu tha se prokurori i rastit, Metush Biraj, nuk është kredibil për të sjellë drejtësi, pasi që thotë se ai ka vepra penale.

“Prokurori i rastit të Astrit Deharit është një njeri i dyshuar për vepër penale të konfliktit të interesit. Metush Biraj, si ushtrues detyre i kryeprokurorit të Prokurorisë Themelore në Prizren, kishte rekomanduar që për ish-gjyqtarin Elez Hoxha, i dyshuar për korrupsion, të ulej dënimi.

Po ashtu, emri i Metush Birajt është nëpër dosje të Komisionit Disiplinor të Këshillit Prokurorial të Kosovës dhe atij edhe i është shqiptuar masa e parafundit disiplinore. Pas kësaj mase është vetëm suspendimi”, ka deklaruar Haxhiu.

© KOHA. Të gjitha të drejtat janë të rezervuara.