Hoxhaj me përfaqësuesit e shteteve frankofone koordinohen për Samitin e Frankofonisë

17 Nëntor 2016 - 16:55      

Ministri i Punëve të Jashtme i Kosovës, Enver Hoxhaj, ka mbajtur takim konsultues me ambasadorët e shteteve frëngjishtfolëse në Kosovë, ambasadorin e Francës, Didier Chabert, të ngarkuarën me punë të misionit të Lukesmburgut, Anne Dostert dhe shefin e Zyrës Diplomatike të Belgjikës, Jean Louis Servais.

Takimi është zhvilluar në kuadër përgatitjeve të Samitit të Frankofonisë që do të mbahet javën e ardhshme në Madagaskar. Hoxhaj i ka njoftuar diplomatët për iniciativën e MPJ-së për krijimin e një fondi bursash për të rinjtë frankofonë kosovarë si dhe për organizimin e një konference për investitorë frankofonë në Kosovë gjatë vitit të ardhshëm, transmeton Koha.net.

“Frankofonia është një ndër organizatat më të rëndësishme sa i takon ndërveprimit të Kosovës dhe qytetarëve të saj me një numër të madh shtetesh frankofone në fushat e ekonomisë, arsimit, kulturës dhe diplomacisë dhe ne synojmë të intensifikojmë bashkëpunimin”, ka deklaruar Hoxhaj.

Nga ana tjetër iniciativa e MPJ-së është vlerësuar lartë nga përfaqësuesit e vendeve partnere të Kosovës, të cilët kanë shprehur gatishmërinë e shteteve të tyre për të bashkëpunuar në realizmin e këtyre projekteve.

Kosova është pjesë e Organizatës Botërore të Frankofonisë (OIF) prej nëntorit të vitit 2014. Gjatë dy viteve të fundit, Kosova ka bërë progres në përafrimin me strukturat dhe programet e OIF. MPJ është ndër mbështetësit kryesorë të Javës së Frankofonisë dhe Festës së Muzikës në Kosovë, në bashkëpunim me Aleancën Franceze të Kosovës.

© KOHA. Të gjitha të drejtat janë të rezervuara.