Kosova prezanton në Sarajevë mundësitë për investime

17 Nëntor 2016 - 15:42      

Në Forumin Ndërkombëtar, i cili po vazhdon në Sarajevë, Kosova u prezantua me pakon e mundësive të reja për investime strategjike për investitorët e rinj të Ballkanit Perëndimor dhe të Evropës.

Në kuadër të temës: Kosova, mundësi e re për investime në Ballkanin Perëndimor, kryetari i AKB-se z. Agim Shahini, ndër të tjera prezantoi legjislacionin në fuqi të Kosovës, Ligjin për Trepçën dhe Ligjin për investime strategjike. Investitorët kinezë, indianë si dhe nga vendet e BE-së shfaqen interesim të madh se si trajtohen investitorët e rinj në bazë të Ligjit të ri për investime strategjike dhe cilat janë ato asete apo potenciale ku mund të investohet me lehtësitë qe ofron ky ligj.

Ndër të tjera u prezantua sektori i minierave, si potencial i pashfrytëzuar në Kosovë, i cili kërkon kapital të freskët dhe kompani me referenca të larta në këtë sektor, po ashtu sektori i turizmit, si potencial i madh në Kosovë dhe i lënë anash, siç është Brezovica, Bjeshkët e Rugovës, por edhe të Bajgorës. Si mundësi të reja u prezantuaN edhe sektorët e energjisë edhe të bujqësisë, të infrastrukturës rrugore, hekurudhore dhe trajtimet e ujërave të zeza si dhe reciklimi i mbeturinave.

Prezantimi i Kosovës vazhdoi me paraqitjen e infrastrukturës ligjore, e cila u vlerësua si përparësi e politikave fiskale, ku në veçanti taksat në dividend janë 0 si një përparësi që shtetet e tjera nuk e kanë.

z. Suat Berisha, nënkryetar i AKB-së paraqiti rrugën e integrimit të Kosovës drejt BE-se si dhe prioritetet që Kosova i ka vënë vetes që të përshpejtojë agjendën e vet për përmbushjen e obligimeve që dalin nga standardet e legjislacionit evropian për vendet e Ballkanit Perëndimor e sidomos atyre vendeve që janë në proces të tranzicionit. Këtu u përmend edhe pengesat e liberalizimit të vizave si dhe rëndësia që ka ky proces për Kosovën.
Lumnije Ajdini, menaxhere e AKB-së, prezantoi të drejtën e gruas afariste në Kosovë si dhe të drejtën në integrimin në institucionet e Kosovës dhe në sektorin privat.

Në Kosovë rreth 50% e popullatës janë femra. Ato përbëjnë potencial zhvillimor të përgatitur për tregun e punës. Ato po japin rezultate edhe në sektorin privat, si forcë konkurruese dhe e përgjegjshme për shoqërinë kosovare.

Promovimi i Kosovës do të vazhdojë edhe në ditët në vijim me aktivitete të shumta, që janë paraparë në kuadër të Javëve të e Biznesit Kosovar 2016 dhe për të gjetur tregje të reja të plasimit të produkteve Made in Kosova dhe për këtë kanë shprehur interesim blerësit potencialë nga Bosnja dhe Hercegovina.

Pjesëmarrja e delegacionit të Kosovës në këtë ngjarje po përcillet me interesim të madh nga të gjithë të pranishmit, por edhe mediat vendore të këtij shteti.