Hoxha në SHBA merr përkrahje për fuqizimin e sundimit të ligjit

16 Nëntor 2016 - 09:14      

Ministrja e Drejtësisë, Dhurata Hoxha, gjatë vizitës zyrtare dyditore në Shtetet e Bashkuara të Amerikës, ka takuar ndihmëssekretarin e Shtetit Hoyt Brian Yee, dhe mori mbështetje të fuqishme nga Departamenti i Shtetit për fuqizimin e sundimit të ligjit dhe sistemin e drejtësisë.

Në këtë takim, Hoxha dhe Hoyt Yee diskutuan për sistemin e drejtësisë në Kosovë, sfidat dhe të arriturat. Ministrja e njohu ndihmëssekretarin në veçanti me angazhimin për reformën në drejtësi.

“Hoyt Yee vlerësoi angazhimin dhe përkushtimin e ministres Hoxha për sundimin e ligjit dhe fuqizimin e legjislacionit që i kontribuon sundimit të ligjit, duke ofruar përkrahje reformës në drejtësi”, thuhet në njoftimin për media të MD-së.

Ministrja Hoxha e njoftoi ndihmës sekretarin për prioritetet e Ministrisë së Drejtësisë siç janë rishikimi funksional i sektorit të sundimit të ligjit dhe reformat legjislative.

Hoxha mori mbështetje të plotë të ndihmëssekretarit të Shtetit Hoyt Yee për reformën legjislative që fuqizon sundimin e ligjit, llogaridhënien dhe transparencën në drejtësi. 

© KOHA. Të gjitha të drejtat janë të rezervuara.