Ymeri: Në Kuvend do të diskutohen provat dhe dëshmitë për rastin e Deharit

15 Nëntor 2016 - 20:25      

Lideri i Lëvizjes Vetëvendosje në një intervistë për Rubikon të KTV-së ka folur mbi seancën dhe nënshkrimet e mbledhura për mbajtjen e seancës për rastin e aktivistit të ndjerë, Astrit Dehari.

Ai ka thënë se mbetet që nesër në mëngjes të kuptohet nëse do të mblidhet kjo seancë.

“Do të diskutohet mënyra se si janë trajtuar provat dhe dëshmitë në rastin e Astrit Deharit”, ka thënë Ymeri.

“Qytetarët e Kosovës janë edhe të zemëruar për rastin por në të njëjtën kohë kërkojnë përgjegjësi për këtë vdekje. Përgjegjësia e shtetit është e pashmangshme pa marrë parasysh mënyrën se si ka vdekur Astriti. Përgjegjësia e parë është politike”, shtoi tutje kryetari i LVV-së.

Ymeri theksoi se deri tash nuk ka asnjë provë kredibile me të cilën ngarkohen gjashtë aktivistët e LVV-së, përfshirë këtu edhe Astrit Deharin.

“Asnjë provë e publikuar deri tash nuk dëshmon lidhjen e këtyre aktivistëve me rastin. Asnjë prej atyre provave nuk janë kredibile. Qartazi këto institucione na tregojnë qe janë të kapura”, ka thënë Ymeri.

© KOHA. Të gjitha të drejtat janë të rezervuara.