Vonesa administrative kosovare ka shtyrë reciprocitetin për targat [video]

15 Nëntor 2016 - 19:13      

Zbatimi i marrëveshjes për reciprocitet të plotë për targat e veturave ndërmjet Republikës së Kosovës dhe Serbisë dhe heqja nga përdorimi i tabelave “prova”, nuk ka nisur sot, siç ishte paraparë, raporton KTV.

Kjo për shkak të vonesave administrative nga pala kosovare.
Ministrja për Dialog, Edita Tahiri, për këtë dështim e ka fajësuar Ministrinë e Punëve të Brendshme, e cila do të duhej t’i prodhonte letrat ngjitëse për targat. Megjithatë, Tahiri ka thënë se 1 dhjetori do të jetë data e fundit kur kjo marrëveshje do të duhej të nisë së zbatuari.

KTV ka kërkuar sqarime edhe nga Ministria e Punëve të Brendshme lidhur me vonesat, por kjo e fundit nuk ka dhënë fare sqarime, duke kërkuar që për të gjitha këto detaje të kërkohen në ministrinë për dialog. Prishtina dhe Beogradi, me ndërmjetësimin e Bashkimit Evropian në Bruksel, dy muaj më parë arritën marrëveshje për reciprocitet të plotë për targat e veturave në mes të Republikës së Kosovës dhe Serbisë.

Vonesa administrative kosovare ka shtyrë... by kohanet

© KOHA. Të gjitha të drejtat janë të rezervuara.