Shefja e Zyrës së BE-së njihet me punën e Zyrës Kombëtare të Auditimit

15 Nëntor 2016 - 16:57      

Auditori i Përgjithshëm i Kosovës, Besnik Osmani, sot ka pritur në takim njoftues, Nataliya Apostolova, Shefe e Zyrës së BE-së në Kosovë njëkohësisht Përfaqësuese e Posaçme e Bashkimit Evropian në Kosovë dhe ku për së afërmi është njoftuar lidhur me punën, rezultatet dhe planet e Zyrës Kombëtare të Auditimit për të përmbushur obligimet kushtetuese dhe standardet ndërkombëtare të auditimit dhe kontabilitetit, njofton kumtesa zyrtare, transmeton Koha.net.

Me këtë rast, Osmani ka shprehur mirënjohjen e tij për rolin që Zyra e BE-së në Kosovë ka luajtur në themelimin dhe ndërtimin e kapaciteteve në mënyrë që Zyra të ofrojë auditime të bazuara dhe me integritet të lartë.

Apostolova, nga ana e saj ka shprehur gatishmërinë që Zyra e BE-së në Kosovë të vazhdojë mbështetjen për Zyrën Kombëtare të Auditimit në zhvillimin e mëtutjeshëm të kapaciteteve dhe rrugën e vet drejt integrimit dhe anëtarësimit në organizatat profesionale të Auditimit si ONISA dhe EUROSAI. Në vazhdim ka nënvizuar rëndësinë që ka Parlamenti dhe Auditori i Përgjithshëm për të mbajtur në llogari Qeverinë për përdorimin e fondeve publike.
Bashkëbiseduesit janë pajtuar për rëndësinë e aktivitetit auditues për të siguruar kontrolle efikase jo vetëm duke raportuar se çka ka ndodhur por edhe duke identifikuar se ku mund të bëhen përmirësimet dhe duke promovuar praktikat e mira.

© KOHA. Të gjitha të drejtat janë të rezervuara.