Në këmbim të kodit telefonik, Kosova legalizon operatorin serb [video]

14 Nëntor 2016 - 19:13      

Deri në fund të këtij viti, Kosova do të mund të fusë në funksion kodin telefonik +383. Ky të paktën është plani i parë që do të nisë të realizohet pas arritjes së marrëveshjes mes Kosovës dhe Serbisë me marrëveshjen e telekomunikacionit.

Me anë të kësaj marrëveshjeje, Kosova merr kodin shtetëror, por i njëjti nuk njihet në ITU si i tillë për faktin se vendi nuk është anëtar i OKB-së, rrjedhimisht i ITU-së, raporton KTV.

Mirëpo, kjo sipas zyrtarëve të Autoritetit Rregullator të Komunikimeve Elektronike dhe Postare, nuk do të paraqesë problem në funksionimin e këtij kodi që sipas marrëveshjes duhet të jetë i gatshëm për përdorim pas 15 dhjetorit.

Kreshnik Gashi, Kryetar i Bordit të ARKEP, ka deklaruar se kompania serbe do të ketë një numër të madh kushtëzimesh.

Serbia, në marrëveshjen e publikuar, ka pranuar se kompania telefonike MTS do të punojë sipas ligjeve të Kosovës dhe do kryejë të gjitha përgjegjësitë që i caktohen nga ARKEP-i, apo nga Agjencia e Regjistrimit të Bizneseve deri më 26 nëntor.

Madje, e njëjta përmend edhe disa obligime financiare që kompania serbe duhet t’ia paguajë ARKEP-it.  

© KOHA. Të gjitha të drejtat janë të rezervuara.