Çka ndodhi në protestën e sotme, “Drejtësi për Astrit Deharin” [video]

14 Nëntor 2016 - 19:09      

Përfaqësues të organizatave joqeveritare e të mediave, doktorë, artistë, publicistë, arkitektë, psikologë, si dhe qytetarë të shumtë, kanë kërkuar “Drejtësi për Astrit Deharin”.

Qindra sish, kanë marshuar nga sheshi “Zahir Pajaziti”, deri para objektit të Qeverisë së Kosovës, me ç’rast kanë kërkuar hetim të pavarur ndërkombëtar, për zbardhjen e këtij rasti, raporton KTV.

Pjesëmarrës kanë qenë edhe aktivistë dhe drejtues të Vetëvendosjes, si dhe familja e Astrit Deharit.

Avokati i familjes Dehari, Tomë Gashi, ka thënë se ende nuk kanë asnjë njoftim zyrtar për rezultatet e autopsisë. Aktivistja e shoqërisë civile, Besa Luzha, ka kërkuar përgjegjësi institucionale për rastin.

Ajo ka theksuar se nëse ministrja e Drejtësisë, Dhurata Hoxha, nuk mund t’u ofrojë qytetarëve të saj drejtësi, atëherë ajo duhet të japë dorëheqje.

Përgjegjësi dhe dorëheqje ajo ka kërkuar edhe nga zinxhiri hierarkik i Shërbimit Korrektues të Kosovës, Policisë Rajonale të Prizrenit, si dhe gardianët e Qendrës së Paraburgimit që dështuan në rastin Dehari.

Aktivisti i Vetëvendosjes, Astrit Dehari, ka vdekur në rrethana ende të pasqaruar, para nëntë ditëve në Qendrën e paraburgimit në Prizren. 

© KOHA. Të gjitha të drejtat janë të rezervuara.