Çka do përfitojë Serbia dhe çka obligohet të bëjë për kodin telefonik të Kosovës

13 Nëntor 2016 - 20:03      

Marrja e kodit telefonik të Kosovës, +383, si pjesë me marrëveshjes me Serbinë në dialogun Kosovë-Serbi, do të bartë edhe obligime për Serbinë, por qw Serbia do të ketë operatorin e saj në Kosovë.

“Në kuadër të zbatimit të kësaj marrëveshje, Serbia obligohet t'i dërgoj letër ITU-së me të cilën pajtohet që ITU t'ja alokoj kodin telefonik Kosovës, dhe ky obligim duhet të realizohet me datën 3 dhjetor 2016. Kosova obligohet që të jep një lejim të përkohshëm dhe të kufizuar për telefoni mobile për një kompani të re mts.d.o, kompani kjo e regjistruar sipas Ligjeve të Republikës së Kosovës. Ky lejim i përkohshëm dhe i kufizuar brenda infrastrukturës aktuale të telefonisë mobile është në përputhje me pikën 4 të Marrëveshjes së Telekomunikacionit të vitit 2013. Kësaj kompanie do t'i ndahen resurse të mjaftueshme frekuencore për të mbuluar zonat që aktualisht mbulon në territorin e Kosovës gjatë kohëzgjatjes së licencës së përkohshme dhe të kufizuar. Për më tepër, operatori në fjalë do të jetë i kufizuar edhe në numrin e përdoruesve (konsumatorëve) që mund t’i ketë gjatë periudhës së autorizimit të përkohshëm”, thuhet nga Qeveria e Kosovës, transmeton Koha.net.

E njëjta kompani, sipas po të njëjtës komunikatë, do të autorizohet edhe për operim në telefoninë fikse bazuar në ligjet e Kosovës.

Të gjithë operatorët ilegal që kanë vepruar pa licencim në Kosovë do të shuhen. Do të largohen të gjitha kodet ekzistuese (381,377, 386) dhe do të përdoret vetëm kodi shtetëror i Kosovës 383 për thirrje ndërkombëtare.

© KOHA. Të gjitha të drejtat janë të rezervuara.