Thaçi akuzohet për shkelje të Kushtetutës për darkën me mësimdhënësit në Drenas [video]

11 Nëntor 2016 - 23:37      

Mbrëmja e së premtes e ka gjetur presidentin e vendit, Hashim Thaçi, në një darkë me afro 700 mësimdhënës të komunës së Drenasit.

Në këtë “Darkë me Presidentin”, i pranishëm ka qenë edhe ministri i Arsimit, Arsim Bajrami.

Ky organizim vjen pikërisht në kohë zgjedhjesh në këtë komunë, pas dorëheqjes së tashmë ish-kryetarit Nexhat Demaku, i cili së fundmi është dënuar me 1 vit e gjysmë burgim.

Nisma për Kosovën ka reaguar ndaj kësaj darke, duke e cilësuar si ndërhyrje të rëndë në procesin zgjedhor për zgjedhjen e kryetarit të Komunës së Drenasit.

Kjo parti, këtë veprim të të parit të vendit e konsideron si shkelje të nenit 83 të Kushtetutës së vendit, ku thuhet se “Presidenti është kreu i shtetit dhe përfaqëson unitetin e popullit të Republikës së Kosovës”.

“Organizimi i një darke të tillë është ushtrim i drejtpërdrejtë i presionit mbi punëtorët e arsimit për interesa partiake, përkatësisht për interesa të PDK-së, nga e cila shihet qartë se ai ende nuk është shkëputur. Me këto veprime, ‘Presidenti’ i Kosovës, përveç që vazhdon politikën e tij të manipulimit e të mashtrimit, ai po vazhdon funksionin e presidentit të vendit ta vë në shërbim të një partie politike, pra të PDK-së”, thuhet në prononcimin e Nismës për Kosovën.

Por, presidenti Thaçi ka refuzuar të komentojë nëse është duke bërë fushatë.
E, as ministri Bajrami nuk ka qenë në gjendje të flasë lidhur me këtë darkë në kohë fushate.

© KOHA. Të gjitha të drejtat janë të rezervuara.

Thaçi akuzohet për shkelje të Kushtetutës për... by kohanet