PDK: Vetëvendosje s’ka forcë politike për të marrë pjesë në zgjedhjet e Drenasit

11 Nëntor 2016 - 13:46      

Përmes një kumtese për medie, Zyra për Komunikim e Partisë Demokratike të Kosovës, ka demantuar deklaratat e Lëvizjes Vetëvendosje lidhur me mospjesëmarrjen në zgjedhjet në Drenas, transmeton Koha.net.

Në këtë kumtesë thuhet:

“Arsyeja e mospjesëmarrjes së Lëvizjes Vetëvendosje në zgjedhjet e jashtëzakonshme në Drenas, kinse ata nuk duan të përfitojnë politikisht nga një dënim i padrejtë gjyqësor, si ai i rastit “Drenica 2”, është vetëm pretekst pa sens nga ana e kësaj Lëvizjeje, duke i marrë parasysh deklaratat e tyre karshi njerëzve që janë prekur nga ky dënim.

Ata kanë deklaruar se në këtë kohë janë duke i forcuar strukturat e tyre organizative me njerëz të moshave dhe profesioneve të ndryshme, por në fakt është krejt e kundërta. Pikërisht mungesa e kuadrove, strukturës dhe fuqisë politike në këtë Lëvizje është edhe arsyeja kryesore e refuzimit të pjesëmarrjes në zgjedhjet e jashtëzakonshme.

Siç merr vesh Zyra e Komunikimit të Partisë Demokratike të Kosovës, një pjesë e madhe e nëndegëve të LVV-së janë tejet të zhgënjyer nga veprimet e tyre, si dhe këtyre ditëve do ta bëjnë edhe zyrtarisht braktisjen e këtij subjekti”.

© KOHA. Të gjitha të drejtat janë të rezervuara.