Nisma: Thaçi po ndërhyn në zgjedhjet e Drenasit

11 Nëntor 2016 - 13:31      

Partia Nisma, me një kumtesë për medie, ka thënë se fesa për “Darkë me Presidentin” që u është bërë punëtorëve të arsimit në Drenas, është ndërhyrje e rëndë në procesin zgjedhor për zgjedhjen e kryetarit të Komunës së Drenasit, transmeton Koha.net.

Ftesa e Hashim Thaçit drejtuar punëtorëve të arsimit në Drenas përbën shkelje të rëndë të kushtetutës së Republikës së Kosovës, përkatësisht nenin 83 të saj në të cilin thuhet qartë se “Presidenti është kreu i shtetit dhe përfaqëson unitetin e popullit të Republikës së Kosovës, thotë kumtesa e Nismës .

Organizimi i një darke të tillë është ushtrim i drejtë për drejtë i presionit mbi punëtorët e arsimit për interesa partiake, përkatësisht për interesa të PDK-së, nga e cila shihet qartë se ai ende nuk është shkëputur, shton kumtesa.

Me këto veprime, “presidenti” i Kosovës përveç që vazhdon politikën e tij të manipulimit e të mashtrimit, ai po vazhdon funksionin e presidentit të vendit ta vë në shërbim të një partie politike pra të PDK-së thotë kumtesa e cila kërkon nga Thaçi që menjëherë të heqë dorë nga këto ndërhyrje të drejtpërdrejta në procesin zgjedhor.

© KOHA. Të gjitha të drejtat janë të rezervuara.