Medie të Beogradit: “ O Trump, he serb!”

11 Nëntor 2016 - 09:16      

Në Serbi po vazhdon ekzaltimi dhe euforia pothuaj në të gjitha shtresat shoqërore e në shumë nivele politike pas zgjedhjes së Donald Trumpit kryetar të SHBA-së, transmeton Koha.net.

Kryetari i Serbisë Tomislav Nikoliq ka thënë se “zgjedhja e Trumpit do të na e lehtësojë jetën”.

Gazeta e Beogradit “Kurir” ka shkuar edhe më larg, kryetarin e zgjedhur amerikan, ajo e ka quajtur serb dhe ka botuar posterin me portretin e tij me mbishkrimin “Trump, he serb”!

Kjo gazetë ka publikuar edhe një bisedë me Milka Milisavleviqin, një serbe, tash 85 vjeçe, e cila, sipas pohimit të saj, ka qenë dado e dy djemve të Trumpit në vitet e 80-ta.

Sipas fjalëve të saj, Donald është i mirë, i vyeshëm, nuk di të urrejë njerëz, e do shumë Serbinë dhe i do sidomos femrat serbe.
Milka ka thënë se Donald Trumpin ka për ta ftuar në drekën tradicionale të vendit të cilën do ta përgatisë vetë.

Edhe medie të tjera serbe shkruajnë me përkëdheli për Trumpin ndërsa theksojnë se në Kosovë gjoja është pikëllim për shkak të humbjes së Hillary Clintonit në këto zgjedhje.

© KOHA. Të gjitha të drejtat janë të rezervuara.