“Kuvendi i Kosovës u bë një ‘hajt pak’”

10 Nëntor 2016 - 21:09      

Deputeti e publicisti, Blerim Shala në një intervistë për “Rubikon” të KTV-së ka folur mbi angazhimin e tij të mundshëm në bisedimet mes Kosovës e Serbisë dhe distancimin e tij nga sfera politike.

Shala bëri të ditur se ende nuk ka diçka konkrete lidhur me rolin e tij në negociatat Kosovë–Serbi, transmeton Koha.net.

Deputeti Shala foli edhe për situatën e fundit në Kuvendin e Kosovës dhe arsyen e distancimit të tij.

“Ka ndryshuar për të keq. Shumë pak merren parasysh argumentet. Më shumë është një qasje që preferon zhurmën, e cila për mua është e pa natyrshme. Parlamenti i Kosovës pati një periudhë shumë problematike me gazin lotsjellës, daljen e opozitës dhe pastaj kthimin. Kuvendi i Kosovës nuk është një ‘hajt pak’”, ka thënë ai.

“Mendoj që muajt e fundit është bërë i tillë. Nuk merremi me çështjet tona që na takojnë, mbi të gjitha ligjvënien”, shtoi tutje Shala.
Ndryshe, Shala për mundësinë e zgjedhjeve të parakohshme vlerësoi se një gjë e tillë nuk bëhet vetëm pse qeveria kërcënohet që ta bëj atë.

“Në zgjedhje nuk duhet të shkohet me shantazhe e kërcënime”, ka thënë Shala duke shtuar se një gjë e tillë nuk prodhon zgjedhje të mira.

© KOHA. Të gjitha të drejtat janë të rezervuara.