Veseli përsërit kërkesën për viza, Lunaçek këmbëngul në plotësim të kushteve

10 Nëntor 2016 - 16:10      

Kryetari i Kuvendit të Kosovës, Kadri Veseli, priti sot në takim nënkryetaren e Parlamentit Evropian, njëherësh raportuese për Kosovën, Ulrike Lunaçek.

Në takim u diskutua, sipas komunikatës nga Kuvendi, për zhvillimet aktuale në Kosovë, me theks të veçantë, për angazhimet e vazhdueshme të institucioneve të vendit në procesin e integrimit evropian, si e vetmja rrugë për shtetin e Kosovës, transmeton Koha.net.

Veseli falënderoi raportuesen Lunaçek për kontributin dhe përkrahjen e saj të pakursyer për Kosovën në Parlamentin Evropian dhe në mekanizma të tjerë të BE-së, duke ia lehtësuar kështu Kosovës rrugën euro-integruese. Ai përsëriti edhe njëherë kërkesën për heqje sa më të shpejtë të vizave për qytetarët e Kosovës nga ana e Bashkimit Evropian.

“Nëse do të vijë lajmi për liberalizim të vizave për Kosovën, atëherë ai do të vijë nga zonja Lunaçek”, theksoi kryetari Veseli.
Nënkryetarja e PE-së, Lunaçek, nga ana e saj, tha se Parlamenti Evropian do ta mbështesë Kosovën në perspektivën evropiane dhe për liberalizimin e vizave, por institucionet e Kosovës duhet t'i plotësojnë kushtet e kërkuara.

Me këtë rast, Veseli tha se Kuvendi i Kosovës do të vazhdojë t'i plotësojë kriteret e kërkuara dhe do të punojë në agjendën e reformës evropiane në Kosovë.

© KOHA. Të gjitha të drejtat janë të rezervuara.