Gashi thotë se kryepolici i Prizrenit, Nexhmi Krasniqi, duhet të shkarkohet

9 Nëntor 2016 - 20:20      

Avokati në rastin Dehari, Tomë Gashi, në “Rubikon” të KTV-së, ka folur mbi deklaratën e drejtorit të Policisë rajonale në Prizren, Nexhmi Krasniqi, i cili ka thënë se Dehari ka ndërruar jetë si pasojë e përdorimit të disa barnave.

Ai kërkoi që Krasniqi ta shpjegojë këtë deklaratë, duke shtuar se kësisoj ai doli në kundërshtim edhe me kryeprokurorin Sylë Hoxha, transmeton Koha.net.

Gashi, duke përmendur rezultatet e deritanishme që tregojnë se Dehari nuk ka përdorur medikamente, kërkoi që Krasniqi ta shpjegojë deklaratën e tij dhe të tregojë se ku e mori atë.

“Nexhmi Krasniqi ka dalë në kundërshtim me shefin e tij, që është Sylë Hoxha. Unë e njoh personalisht Nexhmi Krasniqin, besoj që ky këtë deklaratë duhet t’ua shpjegojë eprorëve e posaçërisht prokurorit. Ai nuk ka përdorur droga e barna, sidomos barna psikotropike gjatë autopsisë. Nexhmi Krasniqi, si drejtor i policisë, ka krijuar mosbesim te të gjithë, veçanërisht te familja Dehari. Një deklaratë e tillë, e cila do duhej të jepte shpjegime se kah e mori Krasniqi këtë informatë që doli e rrejshme, që u demantua edhe nga ekspertët e mjekësisë ligjore, dhe ai as nuk u shpjegua se ku e mori atë informatë”, ka thënë ai.

“Besoj se duhet të shkarkohet”, ka thënë Gashi.

© KOHA. Të gjitha të drejtat janë të rezervuara.